སྤྱི་ལོ་༢༠༢༡ ས་གནས་གཞུང་གི་བཙག་འཐུ་ཐེངས་གསུམ་པའི་དོན་ལུ་ བཙག་འཐུའི་ཐོ་ཡིག་མཐའ་དཔྱད་ཕྱིར་སྤེལ།

༉ འབྲུག་གི་བཙག་འཐུ་ལྷན་ཚོགས་ཀྱིས་ བརྡ་འཕྲིན་ཨང་ ཨི་སི་བི/བརྡ་འཕྲིན-༠༡/༢༠༢༡/༥༣༥༧ སྤྱི་ཚེས་ ༡༠-༡༡-༢༠༢༡ དང་ འབྲུག་གི་བཙག་འཐུའི་བཅའ་ཁྲིམས་ ༢༠༠༨ ཅན་མའི་དོན་ཚན་ ༡༡༨ ཅན་མ་ཚུ་དང་འཁྲིལ་ སྤྱི་ལོ་༢༠༢༡ ས་གནས་གཞུང་གི་བཙག་འཐུ་ཐེངས་གསུམ་པའི་དོན་ལུ་ བཙག་འཐུའི་ཐོ་ཡིག་མཐའ་དཔྱད་དང་ འགྲེམ་ཐོག་ཚོགས་རྒྱན་སྐྱུར་མི་ཚུའི་ཐོ་ཡིག་མཐའ་དཔྱད་འདི་ ཕྱིར་སྤེལ་འབདཝ་ཨིན།

བཙག་འཐུའི་ཐོ་ཡིག་མཐའ་དཔྱད་འདི་ སྤྱི་ཚེས་ ༡༡ ལས་ ༢༠-༡༡-༢༠༢༡ ཚུན་གྱི་དུས་ཡུན་རིང་ལུ་ རྫོང་ཁག་ཚུ་ལས་ “ཐོབ་བརྗོད་དང་ དགག་ཆ་” བཀོད་དེ་ཡོད་མི་ཚུ་ མཉམ་སྡེབ་དང་བསྒྱུར་བཅོས་འབད་བའི་ཤུལ་ལུ་ སྤྱི་ལོ་༢༠༢༡ ས་གནས་གཞུང་གི་བཙག་འཐུ་ཐེངས་གསུམ་པའི་ ཆ་བཞག་ཚེས་གྲངས་ སྤྱི་ཚེས་ ༡-༡༠-༢༠༢༡ ཚུན་ལུ་ ཚོགས་རྒྱན་སྐྱུར་མི་བསྡོམས་ ༤༦༣,༠༤༠ ཡོད་མི་ནང་ལས་ ཨམ་སྲུ་ ༢༣༦,༨༣༦ དང་ ཕོ་རྒས་ ༢༢༦,༢༠༣ ཨིན་མས།

བཙག་འཐུའི་ཐོ་ཡིག་འདི་ འདེམས་ཁོངས་དང་འཁྲིལ་ ཁ་དབྱེ་སྟེ་གཤམ་འཁོད་ལྟར་དུ་ཨིན། 

སྤྱི་ལོ་༢༠༢༡ ས་གནས་གཞུང་གི་བཙག་འཐུ་ཐེངས་གསུམ་པའི་དོན་ལུ་ རྒྱལ་ཁབ་ནང་ ཐོ་བཀོད་གྲུབ་པའི་ཚོགས་རྒྱན་སྐྱུར་མི་བསྡོམས་ལས་ ༤༤,༢༣༡ ༼༣༩,༤༥༣ འབྲུག་ནང་འཁོད་དང་ ༤,༧༧༨ ཕྱི་རྒྱལ༽ གིས་ འགྲེམ་ཐོག་རྒྱན་ཤོག་དང་ ༩༥,༥༩༩ གིས་རྒྱན་ཤོག་ལྷན་ཐབས་ས་ཁོངས་ དེ་ལས་ ༡༥,༠༢༦ གིས་འགྲུལ་བསྐྱོད་ཚོགས་རྒྱན་ས་ཁོངས་ཀྱི་ཐོག་བཀོད་འབད་དེ་ཡོད།

ཚོགས་རྒྱན་སྐྱུར་མི་རེ་རེ་བཞིན་གྱིས་ ཁོ/མོ་རའི་ཚོགས་རྒྱན་ས་ཁོངས་སྐོར་ ཚོགས་རྒྱན་སྐྱུར་མིའི་ཐོ་བཀོད་གནས་རིམ་དང་བརྡ་དོན་ཚུ་ མི་ཁུངས་ངོ་སྤྲོད་ལག་ཁྱེར་དང་ སྐྱེས་ཚེས་ལག་ལེན་འཐབ་ཐོག་ལས་ འབྲུག་གི་བཙག་འཐུ་ལྷན་ཚོགས་ཀྱི་ ཡོངས་འབྲེལ་འཆར་སྒོ་ www.ecb.bt ནང་ Check your Enrollment འབྲེལ་མཐུད་ཐོག་ལས་ བརྟག་ཞིབ་འབད་ཚུགས།  བཙག་འཐུའི་ཐོ་ཡིག་འདི་ རྫོང་ཁག་རང་སོའི་བཙག་འཐུ་ཡིག་ཚང་ ཡང་ན་ ངོས་ལེན་འགོ་དཔོན་གྱི་ཡིག་ཚང་ཁག་ ཡང་ན་ ཐིམ་ཕུག་ཀ་ཝང་བྱང་ས་ལུ་ཡོད་པའི་ འབྲུག་གི་བཙག་འཐུ་ལྷན་ཚོགས་ཀྱི་ ཡིག་ཚང་ལྟེ་བ་ཚུ་ནང་ གཟིགས་ཞིབ་འབད་ཚུགས།

རང་ལུགས་གནམ་ལོ་ ལྕགས་མོ་གླང་ལོ་ རང་ཟླ་ ༡༠ པའི་ཚེས་ ༡༨ ལུའམ་ སྤྱི་ཚེས་ ༢༢-༡༡-༢༠༢༡ ལུ་སྤེལ།