Home > གནས་ཚུལ་གསར་སྟོན། > གནས་ཚུལ་གསར་སྟོན།

གནས་ཚུལ་གསར་སྟོན།

༉ འབྲུག་གི་བཙག་འཐུ་ལྷན་ཚོགས་ཀྱིས་ མི་མང་ཡོངས་ལུ་ཞུ་དོན་འདི་ཡང་ འདེམས་ངོ་ཚུ་གི་སྐོར་ལས་ ཚོགས་རྒྱན་སྐྱུར་མི་ཚུ་ལུ་ བརྡ་དོན་འཕྲོད་ཚུགསཔ་ངེས་བདེན་བཟོ་སྟེ་འབད་བ་ཅིན་ ཕན་ཐོགས་ཅན་གྱི་གདམ་ཁ་བརྐྱབ་ཚུགསཔ་མ་ཚད་ འདེམས་ངོ་ཚུ་ལུ་ཡང་ ཕན་ནུས་ཆེ་བའི་བརྒྱུད་འབྲེལ་འཐབ་ཚུགསཔ་ལས་ ཚོགས་རྒྱན་སྐྱུར་མི་ཚུ་ལུ་ ཁོང་རའི་ཁས་བླངས་གསལ་བསྒྲགས་ཚུ་ གསལ་སྟོན་འབད་དེ་ ཚོགས་རྒྱན་སྐྱུར་མི་ ག་སྟེ་མང་མང་ལུ་ཁྱབ་ཚུགས་པའི་ཐབས་ལུ་ ད་ལྟོ་འགོ་འདྲེན་འཐབ་འཕྲོ་ཡོད་པའི་ ས་གནས་གཞུང་གི་བཙག་འཐུ་ཐེངས་གཉིས་པའི་སྐབས་ རྒྱལ་ཁབ་ཀྱི་སྤྱི་འོག་ཡོངས་ཀྱི་ནང་ལུ་ སྤྱི་སྙོམ་འཛོམས་འདུ་ཚུ་ འགོ་འདྲེན་འཐབ་སྟེ་ཡོད།

རྒེད་འོག་༢༠༥ གི་སྤྱི་འོག་ བསམ་གྲུབ་ལྗོངས་མཁར་ཁྲོམ་སྡེ་ དེ་ལས་ རྫོང་ཁག་ཁྲོམ་སྡེ་ཚུ་ནང་ སྤྱི་སྙོམ་འཛོམས་འདུ་བསྡོམས་༡,༠༡༤ ཚུ་ སྤྱི་ཚེས་༥-༩-༢༠༡༦ ལས་འགོ་བཙུགས་ སྤྱི་ཚེས་༢༡-༩-༢༠༡༦ ཚུན་ འགོ་འདྲེན་འཐབ་སྟེ་ཡོད།

སྤྱི་སྙོམ་འཛོམས་འདུའི་ནང་ བཅའ་མར་གཏོགས་ཡོད་མི་ཡོངས་བསྡོམས་༣༩,༦༢༩ (ཨམ་སྲུ་༡༩,༤༣༤ དང་ ཕོ་རྒས་༢༠,༡༠༥) འཛོམས་ཡོད་མི་ཚུ་ལུ་ འདེམས་ངོ་༣,༤༠༢ གྱིས་ རང་སོའི་བསྐུལ་བསྒྲགས་ཀྱི་གསལ་བཤད་ཚུ་འབད་ཡི། འདེམས་ངོ་ ༣༠ གིས་ སྤྱི་སྙོམ་འཛོམས་འདུའི་ནང་ བཅའ་མར་གཏོགས་མ་ཚུགས་མི་འདི་ གཟུགས་ཁམས་འཕྲོད་བརྟེན་དང་ སྤུངས་ཐང་ཁ་རྫོང་ཁག་ མགོན་ཤར་རི་རྒེད་འོག་ལུ་ འགྲུལ་ལམ་སྲུབ་སྟེ་ཡོདཔ་ལས་བརྟེན་ཨིན།

འདི་གི་ཁ་སྐོང་ལུ་ བསམ་གྲུབ་ལྗོངས་མཁར་ཁྲོམ་སྡེའི་ཁྲོམ་དཔོན་གྱི་འདེམས་ངོ་ཚུའི་ མི་མང་རྩོད་འགྲན་འདི་ སྤྱི་ཚེས་༡༧-༩-༢༠༡༦ ལུ་ འགོ་འདྲེན་འཐབ་སྟེ་ འབྲུག་རྒྱང་བསྒྲགས་ལས་འཛིན་གྱིས་ རྒྱལ་ཡོངས་ལུ་རྒྱང་མཐོང་ཐོག་སྟོན་ཡི།

མི་མང་བརྡ་དོན་ལུ།

 

འབྲུག་གི་བཙག་འཐུ་ལྷན་འཛིན་སྤྱི་ཁྱབ།

Print Friendly